盧覓雪將叱咤903電台節目《在晴朗的一天出發》中聲音專欄《踏破鐵鞋盧覓雪》及《喂呀》的文章結集成書，與大家一起「回味100種香港食物」！

盧覓雪提到：「好多人以為《踏破鐵鞋盧覓雪》係所謂食經，其實借用個人飲食經驗寫成長歲月見證嘅香港，一個回不了去的從前，今日剩下的情懷，令我明白愛要及時，令人回味無窮嘅我稱之為『香港味道』！」

| 內容節錄 |

白粥

資深演員廖啟智 2020年不幸患上胃癌，撰文時正全面停工接受治療，有指他曾一度病情嚴重，但因智叔希望低調處理病情，故未有通知太多朋友。智叔太太陳敏兒透露，智叔 2020年12月因發覺進食時有胃脹感覺，經身體檢查後胃癌立即入院。醫生仲讚佢係A+級好病人，叫佢一日要食多啲嘢至有氣力打仗，佢都好聽話食足三餐。有一日智叔話:「今日有鮑魚雞粥食㖞!」原來佢個碗係白粥，只因為佢覺得白粥都好好味。

廖啟智係陪住我呢一代嘅人成長，由電視台做到拍電影，係不可多得嘅演員。但見到佢老婆描述，真係覺得世事好嘲諷，智叔明明患胃癌，點知醫生要佢一日食足三餐，至有力氣去打仗.........唉!至於智叔喊白粥論，我反而十分認同。

細個嗰陣一係病，一係屋企窮先至會食白粥，但係我好少病，所以多數係因為月尾媽媽手緊，唔夠米煮飯就會煲白粥。當時嘅鄰居係潮州人，唔知係咪佢哋影響咗，媽媽煲嘅係潮州粥，同埋會有潮州人經常食鹹菜同花生，諗番起嚟都幾好送粥。

到我大個咗食多咗唔同喝白粥，我直情愛上吃食白粥，記得舊時澳門大三巴牌坊附近有檔街邊賣粥，佢嘅白粥只需要落幾粒鹽，真係食到鮑魚雞粥嘅味道，即係一啲都唔單調，食得出呢一檔有落腐竹去煲，煲到腐竹溶晒，見唔到但食得出。可惜呢檔口檔主年紀大咗後生接手就少一檔，所以食唔番。

一煲靚白粥，加咗腐竹會豐富咗白粥單調嘅味道，其實仲有豪華版同平民版，豪華版係浸乾瑤柱一齊煲，成煲白粥即刻鮮活咗，呢個做法成本較高。至於平民版就係浸一角陳皮放埋落去，陳皮出嘅味令到煲粥有種沉穩又帶芳香。再後來發現食白粥最好係齋食，也都唔跟，效果就好似水墨畫嘅留白，言有盡而意無窮，等大家可以嗒真啲！

| 作者簡介 |

盧覓雪，

娛樂記者/

電台時事節目主持人/

半生揸筆/

以為做電台靠把口搵食唔再罰抄/

點知聲音專欄都係寫完先錄音/

兜咗一個大圈/