這十年來，你過得好嗎?
我們不再談一個女人要如何自立精彩
就來說說近幾年的日子如何過吧
你會愛的歌還在聽嗎?你常去的城市別來無恙吧
你仍是常下廚，高朋滿座呀
很高興我們仍能在這城中重遇，
聽你娓娓道來，這幾年到底發生過什麼事
 
| 內容節錄 |
 
 
序
 
唔知驚、冇有怕
 
潮流興利申，人申我又申，不過我係「脷」「申」，在此請各位看官有怪莫怪，呢本書嘅序我係用廣東話寫嘅，因為係愛啊！喺香港出世、長大、工作嘅我，大大話話聽咗講咗廣東話幾十年。喺本港接受教育，一直以自己能用兩文三語同人溝通而沾沾自喜，年輕時覺得理所當然嘅事情，年紀漸長就知道並非必然，無常就係必然。所以，仲可以講就講多啲，有得寫就寫多啲。
 
點解嘅？咪就係某日，疫情之後中門大開歡迎遊客之後嘅某一日，喺書店做一日店長嘅星期五，復常地嚟咗一轉又一轉遊客讀者，佢哋雀躍地自顧自留完倩影後就東翻西翻，對書店嘅選書非常好奇。大陸同胞們一 般都好直接問問題，問有冇呢本書嗰本書，做店長當然盡職解答。有一段 時間撞啱舖頭有人滿之患，其實要人滿並不難，上層六個下層六個加埋一 打人就滿瀉。咁嗰日滿員之際，有一位普通話顧客揚聲並揚起手上一張甫 士卡發問:「請問這句話是什麼意思？」我將找續交咗畀面前嘅客人之後 聚焦睇睇嗰張卡上面嘅一行字:「咁大件事冇人講嘅？」......我個咀當時應該係「O」咗嘅，嘩！今次仲唔係考牌？死未？
 
至於我點樣解答該遊客嘅詢問，並非此文嘅重點，假如日後有一本書 叫做《店長日記》嘅話，個答案可能就會喺其中一記。話說當日一眾貴客 離場之後，我就被剛才發生嘅答客問引發出百般滋味，因為喺同一日較早時，已經有另一位從成都搵到來太平山街嘅讀者，翻閱緊見山出版嗰幾本書嘅時候問我:「這文章是用廣東話寫的嗎?」我望咗一眼佢手上揭緊嗰本《單人床》，就答佢:「不全部都是廣東話，算是帶粵語腔的白話吧， 香港式的中文是這樣子的。」面上掛一個尷尬而不失禮貌的微笑。呢位客人亦笑住回答，講一聲:「我很喜歡這種語言，也很喜歡他唱的歌······」 手指指，指着燈下我哋嗰張鎮店海報。就係一日兩次咁，畀人挑起本人一再肯定我愛香港同香港話條筋。開關後嚟行書店嘅廣東話人好多一聽就知唔係本地薑，一問就知原來他來自廣州、澳門、汕頭或者深圳等等。見到咁多新文青到店消費，又可以畀我練口才，都可謂飲得杯落。
 
曾經被長輩話我「識埋啲鬼五馬六、唔三唔四嘅朋友......」係喎，同我投緣嘅人全部都「非正常人」，粒粒性格巨星，個個牙尖嘴利。傾偈時嘅用字遣詞抵死啜核，少啲急才都接唔住，亦都係同呢啲非主流人類打交道得多，令我深深感到廣東話之博大精深，莊諧並融，無論係音韻、字詞運用、句子組成，可以將意思表達得既傳神又到位嘅一種方言，我諗真係非廣東話莫屬。戴定頭盔(又係港式潮語)講多句，可能係我呢個不諳其他方言嘅港燦一廂情願睹。
 
唔係人咁品嘅朋友之中，我最投契嘅係「唔知驚」、「冇有怕」嗰兩款，寥寥可數㗎咋。因為我都係同一類人，所以零舍冇負擔，相處落嚟加自我觀照，覺得呢兩種人可以生存到今日唔係無辜亦非僥倖，不過就要帶有某啲「氣」場先能夠成為呢種人。「唔知驚」嘅人有一種「傻氣」令佢冇乜危機感，反而係唔知邊度嚟咁多安全感，永無驚驚青青，就算危險就在前面，佢慢條斯理傻下傻下又大步檻過，呢裏面可能仲關乎少少「運氣」；有呢種「話之你」性格嘅人，並唔代表佢豐衣足食一帆風順，就係旁人眼中又無人生企劃又無隔夜糧都仲大覺瞓先至突顯出佢嘅「唔知驚」。總之佢又無麻煩到別人咁做一日和尚打一日鐘，你可以替佢急，但皇帝一啲都唔急，好似有一句俗語係形容呢種人:「走火警佢都要吹埋個頭」，如果我喺佢隔離，我諗會拎塊鏡出嚟照埋咁囉！
 
另一種「冇有怕」人種更強。佢哋嘅氣場係「勇氣」加「福氣」，佢哋想做就去做，但唔係盲衝去做，而係考慮周全覺得值得做就勇往直前不惜工本將事情做得漂亮。唔「畏縮」係佢可愛之處，而好多時嗰啲「勇事」都係可以帶到福祉俾受眾嘅。可以係口福、耳福、眼福、知識福甚至鄰里之福。我識得嘅一位「冇有怕」行事低調、抉擇英明，隱隱有「鋤強扶弱」嘅俠氣，曾被我調侃乜都唔怕只係怕醜，佢聽到都只係掩面而笑，有呢啲朋友，令我覺得腰骨都直咗，坐直就水都飲多咗。
 
「冇有怕」咁做人，「唔知驚」咁生活，其實係我嘅理想，不過針又點會兩頭利呢？有人問:「咁嘅時勢出書，你唔驚無人買呀?」我答:「唔驚，驚就兩份」。
 
性格決定命運，行到今日自己係邊一個自己知，能夠同是但一個成為密友大概總帶着愛，我亦帶着對廣東話嘅愛繼續修心修身，喜歡廣東話嘅鏗鏘抑揚，說話、讀書、唱歌都分外好聽。雖然咁話，你地放心揭到下一頁啦，之後嘅文，我係用書面語寫㗎喇。序已至此，明就明，唔明就黎明，啦。
 
二〇二三年四月一日
 
 
| 作者簡介 |
 
何秀萍，多重身份媒體人。進念二十面體創團成員，曾編、導、演多個劇場作品，包括〈列女傳〉、〈石頭記〉、〈我們的愛情喜劇是威士忌〉等。
 
一九九二年至一九九六年間以藝名何利利在香港商業電台任職節目主持，化名「母夜叉」主持節目〈妖獸都市〉，並監制多個廣播劇，計有〈初戀無限次〉、〈戀愛1/2〉、〈我心不死〉等。一九九六年至二〇〇四年離港移居美國西岸。二〇〇五年至二〇一六年重返香港商業電台，為雷霆881創作總監，監製及主持〈有誰共鳴〉、〈杏林茶〉、〈美食殿堂〉、〈兩個女人越夜越美麗〉等等廣播節目二〇一二年曾獲香港演藝人協會頒發電台傑出表現女主持獎。
 
她的另一身份是填詞人，為香港著名流行歌手及樂隊撰寫歌詞，也為進念劇場作品撰寫劇中歌詞。第一首填詞作品是達明一派的〈那個下午我在舊居燒信〉。曾出版文集《從今以後》(1996)，《一個女人》(2013)。近年持續實踐斜桿生活繼續藝遊人生。
 
ig: lilihopia
fb: 一個女人行樂有時 A Flaneur's journal