廣東話資料館「通學」系列第十本，同你一齊講情緒，學識用廣東話抒心情！
 
 
廣東話裡頭有好多獨特嘅情緒詞彙同埋表達方式，呢啲詞彙唔單止精準傳達情感，重帶有濃厚嘅廣東語言嘅文化特色。作為一種充滿感情同表達力的語言，喺情緒詞彙方面非常豐富，可以好精細咁表達唔同嘅心情同感受。
 
廣東話情緒詞彙（Cantonese Emotional Vocabulary），比較常見嘅基本情緒有：喜悅、快樂、憤怒、悲傷、恐懼、厭惡、驚訝、驚奇、羨慕、妒忌等等；而比較常見嘅複雜情緒又有：尷尬、內疚、怕醜、驕傲之類，由道德因素所產生嘅情緒都係複雜情緒。
 
另外，廣東話情緒詞彙表達嘅特色，係好多時會結合埋成語、俚語、歇後語、諺語、疊字或者一啲誇張嘅比喻，甚至自嘲，令到表達嘅意見更加貼地。書中更有部分內容講吓影視娛樂入面嘅經典對白，睇吓你記唔記得邊個角色講過嗰句安慰人哋嘅對白，或者直抒胸臆嘅對白。
 
| 內容節錄 |
 
情緒廣東話
複雜情緒
MIXED EMOTIONS
 
意思係指一種唔單純、交織咗好多種感覺嘅情緒狀態，通常唔係單一嘅喜悅、悲傷或者憤怒，而係可能同時包含咗幾種唔同嘅情緒，或者喺某個情境之下好難清晰去定義嘅情感。例如可能喺開心嘅同時又覺得有啲失落，或者喺緊張嘅時候又有期待嘅感覺。
 
呢種情緒因為層次多、難以捉摸，所以被稱為「複雜」。
 
尷尬 [gaam1 gaai3］ 
Cringe / Embarrassed
 
係指一種唔自然、唔自在或者唔舒服嘅感覺，通常發生喺社交場合，當人覺得場面唔好處理或者有啲難堪嘅時候。例如同一個唔熟嘅人一齊搭電梯，無話題講，氣氛就會變得尷尬。簡單嚟講，就係一種「唔知點算好」嘅狀態。
例句：「佢一出場就跣低，場面一時尷尬起嚟。」
 
補充資料［參考］
好尷尬：形容唔自在嘅狀態。
例句：「佢喺大庭廣眾問我私事，我好尷尬。」
尷尷地：形容輕微嘅尷尬，用喺社交場合。
例句：「撞衫重要同對方同場，尷尷哋。」
尷尬癌：形容尷尬到極點嘅網絡用語。
例句：「佢啲冷笑話搞到我尷尬癌發作。」
尷尷尬尬：形容好唔自然嘅狀態。
例句：「佢尷尷尬尬咁笑，唔知想點。」
 
面紅 ［min6 hung4］ 
Blushing
 
係指一個人嘅面色變得紅紅，通常係因為怕醜、尷尬、煩躁、激動或者嬲同飲咗酒、發熱等原因導致。簡單嚟講，就係形容人面部泛紅嘅狀態，要視乎上下文可能有唔同嘅情感或原因。主要用嚟形容人因情緒波動而面部泛紅的狀態，但具體語境同用法可能帶有粵語特色。
例句：「知自己講錯嘢，所以面都紅晒。」
 
補充資料［參考］
面紅：因怕醜或尷尬而面紅。
例句：「佢畀人讚到面紅。」
因理虧或尷尬而面紅。
例句：「畀人踢爆講大話，梗係面紅啦！」
面紅紅：因為怕醜而面紅。
例句：「畀人喺大庭廣眾讚，我面紅紅。」
面紅耳赤：因為激動而面紅。
例句：「兩個人爭到面紅耳赤。」

口震 「hau2 zan3］ 
Mouth Tremor
喺廣東話入面指一個人講嘢唔流暢，會有結結巴巴嘅情況，可以係因為尷尬或驚訝而口
震，出現講唔出說話嘅狀態。
例句：「佢第一次上台講嘢，因為有啲尷尬而口震。」
 
補充資料「參考］
口震震：因為尷尬或驚訝而講唔出說話。
例句：「畀老師捉到抄功課，我口震震。」
口窒窒：形容結巴、講嘢唔暢順。
例句：「畀老師問我做咗功課未，我答到口窒窒。」

無奈 ［mou4 noi6］ 
Helpless
 
係指一種無可奈何、無能為力嘅感覺，通常係因為某啲情況或者結果唔係自己可以控制合改變，而感到遺憾、失望或者接受現實。簡單嚟講就係一種「冇辦法，只能咁」嘅心情。
例句：「件事搞成咁，惟有無奈接受啦。」
 
補充資料［參考］
好無奈：指對於唔如意嘅事同困境，感到無力解決。
例句：「雖然好努力，但係失敗咗，真係好無奈。
無可奈何：指對某種困境或唔如意事，感到無力改變嘅情緒。
例句：「今次真係無可奈何、無計可施。」
無奈接受：強調唔情願嘅心情，但係仍然需要去面對。
例句：「考試肥咗，無奈接受現實啦。」
 
失望 ［sat1 mong6］ 
Disappointed
 
意思係指因為期望同現實有落差，而感到唔開心、沮喪或者無奈嘅一種情緒。例如有人好期待一件事情嘅發展，但係結果不如所願，咁就會有人覺得失望。用廣東話講「我真係好失望，點解會咁嘅？」意思就係表達一種失落嘅感覺。
例句：「佢唔守承諾，真係失望。」
 
補充資料［參考］
好失望：表示失落、失望嘅感覺。
例句：「等咗咁耐都冇消息，我好失望。」
勁失望：表示程度高嘅失望感覺。
例句：「佢應承咗嚟但最後冇出現，真係勁失望。」
好鬼失望：表示好強程度嘅失望感覺。
例句：「諗住去旅行點知落雨，真係好鬼失望。」
 
——摘自本書P.230-P.234
 
 
| 關於作者 |
 
廣東話資料館 Cantonese Museum
Facebook：https://www.facebook.com/CantoneseMuseum/
Website：http://cantonesemuseum.blogspot.com/